Nadai kebuah enda nyukung perintah

Friday, July 10, 2009 Nadai kebuah enda nyukung perintah

Laban perintah meri pemansang, rayat mesti malas nya ngena sukung sida: Kanyan

KAPIT: Semua projek pemansang endang datai ari perintah magang. Nya alai bala rayat di menua ulu enggau pesisir enda tau enda meri sukung sida ngagai perintah, laban nya meh kena sida malas pemanah perintah ti ngenataika pemansang ngagai sida.

Ketuai raban bansa Iban ba sitak Kapit Temenggong Datuk Kenneth Kanyan madah, nadai kebuah rayat tau enda nyukung perintah, laban perintah sigi endang siru sereta semampai nentuka bala rayat beruntung ari projek pemansang ti dikenataika ngagai menua sida.

“Kitai enda tau enda terus beratka gempung ati enggau penyerakup kitai mayuh sereta sama besukung enggau perintah laban perintah meh ti ngemai pemansang ngagai semua rayat, enda ngira dini alai sida.

“Semua projek pemansang endang sigi diperambu perintah enggau manah ngambika tau nguntungka semua rayat. Nya alai anang mudah tekuing ati laban jaku asut ari sekeda orang ke bisi tuju enda manah deka mechah rayat mayuh, lalu ngasuh sida ngejang ari perintah, ngerachun runding sida awakka pedis ati ngagai perintah.

“Penemu orang ke bakanya mina deka ngerugika rayat mayuh, kelebih agi enti sida enda terus nyukung perintah,” ku Kanyan ngelalau sida.

Perintah, ku iya endang semampai naka ulih mantu rayat, enda ngira sida di nengeri tauka di pesisir. Semua rayat endang diberi awak ensepi penguntung ari pemansang, ku iya nerang.

Kanyan mansutka jaku lalau munyi nya lebuh ke berandau enggau mensia mayuh ba Rumah Jampong Meng, Nanga Panyau, Batang Baleh, apin lama.

Sama bisi datai ba atur nya Residen Kapit Dahim Nadot, Sapit Residen Selamat Jati, DO Simon Japut Tiok, sekiteri politik ka Kepala Menteri Wilson Ugak Kumbong, Pemancha David Dian sereta urung bisi 30 iku bala tuai rumah ari menua Nanga Baleh ngagai menua Mujong ba Batang Baleh ditu.

Rumah panjai 48 pintu sida Jampong nya urung penyauh 20 km ari pasar Kapit.

Ku Kanyan nambah, agi mayuh rumah panjai di menua ulu ke apin bisi infrastruktur pelasar enggau utai bukai baka jalai kampung, jalai semin, jelatung, bekal karan enggau bekal ai beresi sereta sekeda utai bukai ti diguna sida.

Semua utai tu, ku iya, mina ulih dikenataika perintah aja.

Serimbai nya, iya meri puji ngagai mensia mayuh ti ngelamatu udah seruran nyukung Barisan Nasional baruh pegai Perdana Menteri enggau Kepala Menteri kitai.

Iya mega madah, perintah udah mayuh ngenataika pemansang ngagai menua Kapit, kelebih agi baka jalai alun enggau mayuh pemansang infrastruktur ke bukai ngagai serata menua di Kapit ditu.

Dulu ari tu, lebuh ke baru datai ba rumah panjai nya, Kanyan enggau bala iya endang diambat penatai ngena basa besai rumah panjai.

Iya mega diberi basa ngulu atur miring sebedau sida ngemunka randau sida sehari nya.

emmmm.............. oo perintah kami di ulu bakani?, karan bedau ga datai udah berpuluh taun kami nyukung.. badu gak kami nyukung perintah.

Artikel - artikel terbaru Terus ke Email anda? Sila taipkan Email anda dibawah: